Samfélagið

Sterkt samfélag einkennist af samstöðu, virkri þátttöku og gagnkvæmri virðingu. Þegar íbúar hafa tækifæri til að koma að ákvörðunum og leggja sitt af mörkum eflist samtakamáttur samfélagsins. Mikilvægt er að skapa vettvang þar sem raddir íbúa heyrast og hugmyndir þeirra fá að þróast.

Við viljum samfélag þar sem íbúar finna að þeir tilheyra og þar sem auðvelt er að taka þátt. Með aukinni þátttöku og opnum samskiptum má skapa sterkari tengsl milli íbúa og sveitarfélags.

• Halda árlega opna íbúafundi þar sem rætt er um verkefni og forgangsröðun
• Skapa vettvang þar sem íbúar taka beinan þátt í ákvörðunum um þróun bæjarins
• Beita hvötum til að auka áhuga lóðarhafa og byggingaraðila á uppbyggingu húsnæðis
• Taka vel á móti nýjum íbúum með stuðningi og íbúahandbók sem styður þátttöku þeirra í samfélaginu

Fjölskyldan

Við viljum að Bolungarvík sé eftirsóttur staður fyrir fjölskyldur þar sem börn fá góðan stuðning og jöfn tækifæri í leik og námi. Við ætlum að bæta aðbúnað menntastofnana bæjarfélagsins og stuðla að vellíðan barnanna okkar.

• Endurnýja ærslabelginn
• Hækka frístundastyrk í 80.000 kr á hvert barn á ári
• Efla frístundarútuna með aukinni tíðni ferða og bættum aðbúnaði

Ungmennin

Ungmenni gegna lykilhlutverki í þróun samfélagsins og mikilvægt er að skapa þeim skilyrði til þátttöku. Með því að hlusta á raddir þeirra og gefa þeim tækifæri til áhrifa má byggja upp sterka framtíðarsýn.

Við viljum að ungmenni í Bolungarvík hafi raunveruleg tækifæri til að taka þátt í samfélaginu og leggja sitt af mörkum.

• Efla þátttöku ungmenna í ákvarðanatöku og samfélagslegum verkefnum og auka fjölbreytni þeirra
• Tryggja að akstursíþróttir fái nauðsynlegt æfingasvæði
• Veita öllum börnum að 18 ára aldri gjaldfrjálsan aðgang að sundlaug bæjarins
• Flytja frisbígolfvöllinn úr skógræktinni með það að markmiði að gera hann aðgengilegri

Umhverfið

Gott umhverfi hefur bein áhrif á lífsgæði, vellíðan og upplifun íbúa. Snyrtimennska, skipulag og góð umgengni skapa jákvæða ásýnd og gera bæinn aðlaðandi fyrir bæði íbúa og gesti.

Við viljum að eignum bæjarins sé vel við haldið svo sómi sé af, með sérstaka áherslu á skóla- og íþróttamannvirkin. Við ætlum að gera tímasetta áætlun um skipulagða uppbyggingu, reglubundið viðhald og aðgerðir sem bæta ásýnd bæjarins.

• Laga áratuga gamlar holur á götum bæjarins (og nýjar)
• Auka aðgengi að umhverfisvænum lausnum með grenndarstöð
• Fjölga ruslatunnum á opnum svæðum og tryggja reglulega tæmingu þeirra
• Tryggja að neysluvatnið standist gæðakröfur

Atvinnulífið

Í Bolungarvík er öflugt atvinnulíf sem er undirstaða vaxtar og velferðar í samfélaginu. Við viljum stuðla að fjölbreyttari atvinnutækifærum, meðal annars með uppbyggingu smærri fyrirtækja á iðnaðarsvæðum og skapa umhverfi þar sem fyrirtækin geta blómstrað.

Við leggjum áherslu á að styðja áfram við uppbyggingu laxeldis sem eina af meginstoðum atvinnulífsins í Bolungarvík. Við ætlum að bæta hafnaraðstöðuna og þrýsta á stjórnvöld að setja framkvæmdir við höfnina ofar í forgangsröð.

• Útbúa viðlegubása (fingur) við eina flotbryggju og afmarka landsvæði fyrir geymsluaðstöðu smábáta
• Gera samning við ferðaþjónustuaðila um rekstur tjaldsvæðisins og aðra ferðamannastaði
• Tryggja framboð á fjölbreyttu íbúðarhúsnæði fyrir fólk sem starfar í bæjarfélaginu

Velferðin

Velferðarkerfið er grunnur að öryggi og lífsgæðum íbúa. Mikilvægt er að þjónustan sé aðgengileg, skilvirk og byggð á þörfum fólks á öllum aldri.

Við viljum tryggja jafnan aðgang allra að góðri þjónustu og veita stuðning sem eykur sjálfstæði, vellíðan og öryggi. Við viljum að eldri Bolvíkingunum okkar líði vel og geti sótt öflugt félagsstarf, hvort sem það er í bænum okkar eða nágrenni.

• Endurskipuleggja velferðarþjónustu með áherslu á gæði og hagkvæmni
• Bjóða upp á skýra, aðgengilega þjónustu sem er auðveld í notkun
• Tryggja betra aðgengi að stuðningsþjónustu, þar með talið heimsendum mat og snjómokstri við heimili

Stjórnsýslan

Góð stjórnsýsla byggir á trausti, fagmennsku og ábyrgð. Skýr stefna og gegnsæi í ákvarðanatöku eru lykilatriði í því að skapa traust milli íbúa og sveitarfélags. Þegar upplýsingar eru aðgengilegar og ákvarðanir vel rökstuddar styrkist samfélagið.

Við viljum stjórnsýslu sem vinnur markvisst fyrir íbúa, nýtir fjármagn á ábyrgan hátt og hefur skýra yfirsýn með rekstri og forgangsröðun verkefna til lengri tíma. Með bættri upplýsingagjöf og skýrari ferlum verður auðveldara fyrir íbúa að fylgjast með, taka þátt og hafa áhrif.

• Lækka álögur á íbúa með bættum rekstri
• Hætta vísitölutengdri hækkun gjaldskráa
• Birta mánaðarlegar rekstrarskýrslur með skýrum og skiljanlegum hætti
• Tryggja gagnsæi og fagleg útboðs- og ákvarðanatökuferli í öllum stærri verkefnum
• Gera fundargerðir, gögn og upplýsingar aðgengilegar á einfaldan og notendavænan hátt

Menningin

Menning og listir eru mikilvægur hluti af lífsgæðum í samfélaginu. Virkt menningarlíf skapar samkennd, eykur aðdráttarafl bæjarins og gefur íbúum og þeim sem sækja okkur heim, tækifæri til þátttöku og sköpunar.

Við viljum efla menningu í Bolungarvík þannig að hún verði sýnileg. Við ætlum að tryggja aðgengi að menningu óháð aldri og gera söfnum bæjarfélagsins hátt undir höfði.

• Virkja íbúa og fyrirtæki til að skipuleggja viðburði í Bolungarvík svo sem sjómannadaginn, markaðshelgina og þrettándagleðina
• Styðja við listir og skapandi greinar með auknu fjármagni
• Móta metnaðarfulla og framsýna menningarstefnu fyrir Bolungarvíkurkaupstað